Rexhep Selimi për Thaçin: Kur VV të vijë në pushtet, ai e ka vështirë të jetë president

19:58 | 13 Qershor 2019
Arbresh.info

Deputeti i lëvizjes Vetëvendosje, Rexhep Selimi, ka thënë se në rast se Lëvizja Vetëvendosje fiton pushtetin në Kosovë, atëherë Hashim Thaçi do ta ketë shumë vështirë të mbajë postin e presidentit.

Selimi ka folur të enjten në “Imazh” te RTK.

“Edhe Thaçi e edhe Vetëvendosje në pushtet e kanë vështirë. E ka vështirë Thaçi të qëndrojë aty. Me një mazhorancë tjetër do ta dërgonim Thacin në Kushtetuese”, ka thënë ai.

Deputeti Selimi ka theksuar se Thaçi e ka shkelur Kushtetutën me rastin e idesë së korrigjimit të kufijve. “Më e pakta që duhet të bëjë është të ikë nga zyrja”, ka thënë ai.

Selimi është shprehur se është në gjendje të japë jetën për bashkimin kombëtar, por nuk e mbështetë Thaçin në deklaratat e tij të fundit për bashkimin kombëtar, ngase sipas tij ai nuk e ka një plan të tillë.